काठमाडौं, साउन ६ — दिल्लीमा जारी विद्यार्थी आन्दोलनको समर्थनमा भारतको बिहार राज्यको राजधानी पटनामा विद्यार्थीहरूले प्रदर्शन गरेका छन्। प्रदर्शनका क्रममा प्रहरी र प्रदर्शनकारीबीच झडप हुँदा केही सञ्चारकर्मीसहित प्रदर्शनकारीहरू घाइते भएका छन्।
अल इन्डिया स्टुडेन्ट्स एसोसिएसन (आइसा) को आह्वानमा आयोजित प्रदर्शनमा विभिन्न विद्यार्थी संगठनका प्रतिनिधिहरूको सहभागिता रहेको थियो।
प्रदर्शनकारीहरूको मार्च गान्धी मैदानको गेट नम्बर १० बाट सुरु भई राजभवनतर्फ अघि बढ्ने क्रममा प्रहरीले जेपी गोलम्बर क्षेत्रमा उनीहरूलाई रोक्ने प्रयास गरेको थियो। भीड नियन्त्रणका लागि प्रहरीले वाटर क्यानन प्रयोग गर्नुका साथै अश्रुग्यासका गोला प्रहार गरेको जनाएको छ।
बीबीसीका भिडियो पत्रकार शाहनवाज अहमदका अनुसार प्रहरीले दुई राउन्ड अश्रुग्यास प्रहार गरेको थियो। यस क्रममा केही प्रदर्शनकारीले प्रहरीमाथि ढुंगामुढा गरेको आरोप पनि लगाइएको छ।
प्रहरीको अवरोधका बाबजुद प्रदर्शनकारीहरू जेपी गोलम्बर पार गर्दै डाक बङ्गला चौराहासम्म पुगेका थिए। प्रदर्शनका क्रममा उनीहरूले विभिन्न नाराबाजी गरेका थिए, जसमा ‘गोदी मिडिया गो ब्याक’ भन्ने नारा पनि समावेश थियो।
घटनाका क्रममा केही सञ्चारकर्मी र प्रदर्शनकारी घाइते भएको जनाइएको छ। घटनापछि उक्त क्षेत्रमा सुरक्षा व्यवस्था थप कडा पारिएको छ।
